ကျောက်ကပ်ကင်ဆာ
ကျောက်ကပ်ကင်ဆာသည် ကျောက်ကပ်ရှိဆဲလ်များ ကင်ဆာဖြစ်လာပြီးနောက် ထိန်းချုပ်မဲ့ ကြီးထွားလာပြီး အကျိတ်တစ်ခုဖြစ်ပေါ်လာပါသည်။ ကျောက်ကပ်ကင်ဆာများအားလုံးနီးပါးသည် ကျောက်ကပ်ရှိ သေးငယ်သော ပြွန်ငယ်လေးများ အနားသတ်များတွင် ပထမဆုံး ဖြစ်ပေါ်လာပါသည်။ ဤကျောက်ကပ်ကင်ဆာအမျိုးအစားကို ကျောက်ကပ်ဆဲလ် ကာစီနိုးမားလို့ ခေါ်ပါသည်။ သတင်းကောင်းကတော့ ကျောက်ကပ်ကင်ဆာများသည် အခြားသော အင်္ဂါများသို့ မပျံ့နှံ့ခင် တွေ့ရှိတတ်ကြပါသည်။ ၎င်းနောက် ကင်ဆာကို စောစီးစွာ သိပြီးအောင်မြင်အောင် ကုသလို့ရပါသည်။ သို့သော် ၎င်းကင်ဆာအကျိတ်များသည် ကင်ဆာလို့ မသိရှိခင် အရွယ်အစားကြီးမားနိုင်ပါသည်။
ကျောက်ကပ်များသည် ပဲစေ့ပုံ နှစ်ခု ရှိပြီး တစ်ခုစီသည် လက်သီးဆုတ်အရွယ်အစားခန့် ရှိပါသည်။ သူတို့သည် သင့်ကျောရိုးတစ်ဖက်စီမှာ ဝမ်းဗိုက်အောက်ပိုင်းတွင် ရှိပါသည်။ သူတို့၏ အဓိကအလုပ်မှာ သင့်သွေးရှိ မကောင်းသော ထုတ်လုပ်မှုများကို ဖယ်ထုတ်ကာ ဆီးအဖြစ်စွန့်ထုတ်ပြီး သင့်သွေးကို သန့်စင်ပေးပါသည်။
ကျောက်ကပ်ကင်ဆာဖြစ်စေသော အကြောင်းရင်းသည် မရှင်းလင်းသေးပါ။ သို့သော် ကျောက်ကပ်ကင်ဆာ ဖြစ်နိုင်ချေများစေသော အချို့သော အချက်များ ရှိပါသည်။ ဥပမာ - ကျောက်ကပ်ကင်ဆာသည် အသက်(၄၀)နှင့်အထက် လူများတွင် ဖြစ်လေ့ရှိပါသည်။ ကျောက်ကပ်ကင်ဆာအတွက် အချို့သော ဖြစ်နိုင်ချေများမှာ အောက်ပါအတိုင်း ဖြစ်ပါသည်။
- ဆေးလိပ်သောက်ခြင်း - ဆေးလိပ်သောက်လျှင် ကျောက်ကပ်ကင်ဆာဖြစ်နိုင်ချေသည် ဆေးလိပ်မသောက်သူများထက် နှစ်ဆဖြစ်နိုင်ချေများပါသည်။ ဆေးပြင်းလိပ်သောက်ခြင်းသည်လည်း သင့်ဖြစ်နိုင်ချေကို များစေပါသည်။
- ယောင်္ကျားလေးဖြစ်ခြင်း - ကျောက်ကပ်ကင်ဆာသည် အမျိုးသမီးများထက် အမျိုးသားများတွင် နှစ်ဆပို ဖြစ်နိုင်ချေရှိပါသည်။
- အဝလွန်ခြင်း - ကိုယ်အလေးချိန် များခြင်းသည် သင့်ဖြစ်နိုင်ချေကို မြင့်စေသော ဟော်မုန်းအပြောင်းအလဲများကို ဖြစ်စေနိုင်ပါသည်။
- ကျောက်ကပ်ရောဂါ အဆင့်မြင့်နေခြင်း ( သို့ ) ကြာမြင့်စွာ ကျောက်ကပ်ဆေးနေရခြင်း
- အချို့သော မျိုးရိုးဗီဇ အခြေအနေများ - Von Hippel-Lindau (VHL) ရောဂါ ( သို့ ) inherited papillary renal cell carcinoma ကဲ့သို့သော ရောဂါများ
- မိသားစုတွင် ကျောက်ကပ်ရောဂါ ရာဇဝင်ရှိခြင်း - အထူးသဖြင့် မောင်နှမများတွင် ဖြစ်နိုင်ချေများပါသည်။
- အချို့သော ဓာတုပစ္စည်းများကို ထိတွေ့မှုရှိခြင်း - ကျောက်မှုန်များ ၊ ကပ်မီယမ်၊ ဘန်ဇင်း ၊ အော်ဂဲနစ် ပျော်ရည်များ ( သို့ ) အချို့သော ပိုးသတ်ဆေးများ
- သွေးတိုးရှိခြင်း
ဤဖြစ်နိုင်ချေအချက်များသည် ကျောက်ကပ်ကင်ဆာကို ဖြစ်ကို ဖြစ်မည်ဟု မဆိုလိုပါ။ သင့်တွင် အထက်ပါ အချက်တစ်ချက်မှ မရှိလည်း ကျောက်ကပ်ကင်ဆာဖြစ်နိုင်ပါသေးသည်။
ကျောက်ကပ်ကင်ဆာသည် တော်တော်များများတွင် စောစီးစွာ လက္ခဏာမပြတတ်ပါ။ အကျိတ်ကြီးလာသောအခါ ရောဂါလက္ခဏာများ ဖြစ်ပေါ်လာနိုင်ပါသည်။ သင့်တွင် ကျောက်ကပ်ကင်ဆာ လက္ခဏာများ ထဲမှ တစ်ခု ( သို့ ) များစွာ ရှိနိုင်ပေသည်။
- သင့်ဆီးတွင် သွေးပါခြင်း
- နံဘေးခြမ်းတွင် ( သို့ ) ဝမ်းဗိုက်တွင် အလုံးဖြစ်ခြင်း
- အစားအသောက်ပျက်ခြင်း
- တစ်ခြမ်းနာနေခြင်းသည် မပျောက်ခြင်း
- ကိုယ်အလေးချိန်သည် အကြောင်းရင်းမရှိ ကျဆင်းနေခြင်း
- အဖျားသည် အအေးမိခြင်း ( သို့ ) အခြားသောရောဂါပိုးဝင်ခြင်း မဟုတ်ပဲ ရက်သတ္တပတ်များစွာ အကြာ ရှိနေခြင်း
- အလွန်အမင်း ပင်ပန်းနွမ်းနယ်ခြင်း
- သွေးအားနည်းခြင်း
- ခြေမျက်စိ ( သို့ ) ခြေထောက်ယောင်ခြင်း
ကျောက်ကပ်ကင်ဆာသည် ခန္ဓာကိုယ်၏ အခြားသော အစိတ်အပိုင်းများသို့ ပျံ့နှံ့သောအခါ အခြားသော လက္ခဏာများကို ဖြစ်စေနိုင်ပါသည်။ ၎င်းတို့မှာ -
- အသက်ရှုမောခြင်း
- ချောင်းဆိုးသွေးပါခြင်း
- အရိုးနာကျင်ခြင်း
ကျောက်ကပ်ကင်ဆာလက္ခဏာများမှာ - ကိုယ်နံဘေးခြမ်းနာခြင်း၊ ကိုယ်အလေးချိန်ကျခြင်း ( သို့ ) အလွန်အမင်း မောပမ်းခြင်း တို့ ဖြစ်နိုင်ပါသည်။ ( သို့ ) ဆရာဝန်သည် ပုံမှန်စမ်းသပ်စဉ် သင့်နံဘေးတွင် အလုံးစမ်းသပ်မိနိုင်ပါသည်။ ( သို့ ) အခြားရောဂါအတွက် စစ်ဆေးနေစဉ် ကျောက်ကပ်ကင်ဆာ လက္ခဏာကို တွေ့နိုင်ပါသည်။ ဘာလိုပဲဖြစ်ဖြစ် ကျောက်ကပ်ကင်ဆာဟု သေချာစေရန် စမ်းသပ်စစ်ဆေးခြင်း၊ ကျန်းမာရေးရာဇဝင် နှင့် စစ်ဆေးချက်များကို လုပ်ဆောင်ရန် လိုအပ်ပါသည်။
သင့်ဆရာဝန်သည် သင့်ဝမ်းဗိုက်နှင့် နံဘေးခြမ်းတွင် အလုံးကို စမ်းမိနိုင်ပြီး အခြားအရာများကြားတွင် အဖျားနှင့် သွေးတိုးကိုလည်း စစ်ဆေးနိုင်ပါသည်။ သင်သည် သင့်ကျန်းမာရေး အလေ့အကျင့်၊ ပြီးခဲ့ပီးသော ဖျားနာမှုများ၊ နှင့် ကုသမှုနည်းလမ်းများအကြောင်း မေးခွန်းများလည်း ဖြေရလိမ့်မည်။ ကျောက်ကပ်ကင်ဆာဟု ရောဂါနာမည်တပ်နိုင်ရန် သင့်ဆရာဝန်သည် တစ်ခု ( သို့ ) ပိုများသော စစ်ဆေးချက်များကို လုပ်ခိုင်းပေလိမ့်မည်။
- ဆီးစစ်ဆေးခြင်းများ - သင့်ဆီးတွင် သွေးနှင့် အခြားသော ပြဿနာများ၊ လက္ခဏာများကို စစ်ဆေးပါသည်။
- သွေးစစ်ဆေးခြင်းများ - သင့်ကျောက်ကပ်ဘယ်လိုအလုပ်လုပ်နေသလဲကို ပြသပါသည်။
- သွေးပြန်ကြောအတွင်းကြည့် ဓာတ်မှန် (IVP ) - သင့်ဆီးလမ်းကြောင်းထဲသို့ ဆိုးဆေးရည်ထိုးထည့်ပြီးနောက် အကျိတ်များကို ထင်ရှားစေပြီးနောက် သင့်ကျောက်ကပ်များကို ဓာတ်မှန်ရိုက်ခြင်း ဖြစ်ပါသည်။
- Ultrasound အာထရာဆောင်း - သင့်ကျောက်ကပ်များကို အသံလှိုင်းသုံး၍ ပုံရိပ်ဖော်ခြင်းဖြစ်ပါသည်။ အကျိတ်သည် အစိုင်အခဲ ( သို့ ) အရည်ပြည့်နေသည်ကို ပြောနိုင်ပါသည်။
- CT scan - ကွန်ပျုတာနှင့် ဓာတ်မှန်သုံး၍ သင့်ကျောက်ကပ်များ၏ အသေးစိတ်ပုံများကို အစီအစဥ်အလိုက် ဖန်တီးခြင်းဖြစ်ပါသည်။ ၎င်းသည်လည်း ဆိုးဆေးထိုးထည့်ရန်လည်း လိုအပ်နိုင်သည်။ သည် ကျောက်ကပ်ကင်ဆာကို ရောဂါရှာဖွေရာတွင် နှင့် အာထရာဆောင်းနေရာကို အစားထိုးဝင်ရောက်လာပြီ ဖြစ်ပါသည်။
- Magnetic Resonance Imaging (MRI)- ပြင်းထန်သော သံလိုက်ဓာတ်များနှင့် ရေဒီယိုလှိုင်းများ အသုံးပြု၍ သင့်ခန္ဓာကိုယ်တွင် တစ်သျှူးပျော့များ၏ အသေးစိတ်ပုံများကို ဖန်တီးပါသည်။ ပိုမိုကောင်းမွန်သော ပုံများရရှိရန် ဆိုးဆေးထိုးရန် လိုနိုင်ပါသည်။
- Renal Arteriogram - ဤစစ်ဆေးချက်သည် အကျိတ်ကို သွေးအထောက်အပံ့မှုကို သိနိုင်ရန် သုံးပါသည်။ ၎င်းကို မကြာခဏ မသုံးသော်လည်း သေးငယ်သော အကျိတ်လေးများကို တွေ့ရှိနိုင်ရန် ကူညီပါသည်။ အခြားသော နေရာများတွင်လည်း အသုံးပြုပါသည်။
အခြားသော ကင်ဆာများနှင့် မတူတာကတော့ သင့်ဆရာဝန်သည် အသားစယူစရာမလိုပဲ ကျောက်ကပ်ကင်ဆာဟု သေချာသလောက် ပြောနိုင်ပါသည်။ တခါတရံ အသားစယူခြင်းသည် ရောဂါနာမည်သတ်မှတ်ရန် ပိုမိုသေချာစေပါသည်။ ဆရာဝန်သည် အသားစ နမူနာယူပြီးနောက် အဏုကြည့်မှန်ပြောင်းအောက်တွင် ကင်ဆာဆဲလ်များကို ရှာဖွေပါသည်။ အသားစယူခြင်းဖြင့် ကင်ဆာသည် ဘယ်လောက်ဆိုးနိုင်သလဲ ဆိုသည့် ကင်ဆာအဆင့်ကိုလည်း ပြောနိုင်ပါသည်။ တခါတရံ ခွဲစိတ်ဆရာဝန်သည် အကျိတ်တစ်ခုလုံးကို ရိုးရှင်းစွာ ဖယ်ရှားလိုက်ပြီးနောက် အသားစနမူနာကို စစ်ဆေးပါသည်။
သင့်ဆရာဝန်သည် ကျောက်ကပ်ကင်ဆာဟု သတ်မှတ်လိုက်သည်နှင့် တပြိုင်နက် သင့်ကျောက်ကပ်အတွင်း ၊ အခြားသော ကျောက်ကပ်သို့ ၊ ( သို့ ) အခြားသော ခန္ဓာကိုယ်အစိတ်အပိုင်းသို့ ပျံ့နှံ့ခြင်းရှိမရှိကို သိနိုင်ရန် အခြားသော စစ်ဆေးမှုများ လုပ်ပေလိမ့်မည်။ ကင်ဆာသည် ပထမစတင်သောနေရာမှ ပျံ့နှံ့သောအခါ အခြားနေရာသို့ ရောက်နိုင်ပေသည်။ ထိုအခါ သင်သည် CT scan ( သို့) MRI လိုအပ်ပါသည်။ chest X-ray သည် ကင်ဆာအဆုတ်သို့ ပျံ့သည်ကို ပြသပါသည်။ အရိုးဓာတ်မှန်သည် သင့်အရိုးများတွင် ကင်ဆာရှိမရှိကို မြင်နိုင်ပါသည်။ ထိုစစ်ဆေးမှုများသည် သင့်ဆရာဝန်ကို ကျောက်ကပ်ကင်ဆာ အဆင့်ကို ဆုံးဖြတ်နိုင်စေပါသည်။
ကျောက်ကပ်ကင်ဆာတွင် အဆင့် လေးဆင့်ရှိပါသည်။ အဆင့်ပိုမြင့်လေ ကင်ဆာသည် ပိုမိုနောက်ကျနေပြီဖြစ်ပါသည်။
ယေဘုယျအားဖြင့် ကင်ဆာသည် တစ်နေရာတည်းတွင် ရှိနေပြီး ဘေးပတ်လည်အသားစများသို့ ဝင်ရောက်ခြင်းမရှိသေးသောအခါ ခွဲစိတ်ခြင်းဖြင့် ပျောက်အောက် ကုသနိုင်သော အကောင်းဆုံး အခွင့်အရေး ရပါသည်။ အဆင့် ( လေး ) ကျောက်ကပ်ကင်ဆာတွင် ဘေးပတ်လည်နှင့် အခြားသော အစိတ်အပိုင်းသို့ ကင်ဆာပျံ့နှံ့နေသောအခါ ကုသမှုနည်းလမ်းသည် ကင်ဆာကို ထိန်းချုပ်ရန်နှင့် ရောဂါဝေဒနာသက်သာစေရန် ရည်ရွယ်ပြီး ပစ်မှတ်ထားကုထုံး၊ မိမိခုခံအားစနစ်သုံးကုထုံး ( သို့ ) ကင်ဆာဆေးသွင်းခြင်း ကဲ့သို့သော ခန္ဓာကိုယ်တစ်ခုလုံးကို ကုသသော နည်းလမ်းများကို ရွေးချယ်ပါသည်။
ခွဲစိတ်ကုသခြင်း
ခွဲစိတ်ကုသခြင်းသည် အကျိတ်ရှိနေသော အသားစများကို ဖယ်ရှားခြင်းနှင့် အနီးရှိ အသားစများ/ ပြန်ရည်ကျိတ်များကို ဖယ်ရှားခြင်းဖြစ်ပါသည်။ ၎င်းကို ဝမ်းဗိုက်တွင်းသို့ အပေါက်လေးဖောက်ကြည့်သော မှန်ပြောင်း ( laparoscopy ) ( သို့ ) ဖွင့်၍ ခွဲစိတ်ခြင်းတို့ လုပ်နိုင်ပါသည်။ ၎င်းတို့တွင် ကျောက်ကပ်ကင်ဆာအတွက် အဓိကခွဲစိတ်နည်းများ ဖြစ်ပါသည်။ ဘယ်အမျိုးအစားလိုအပ်မလဲကတော့ သင့်ကင်ဆာ ဘယ်လောက်အဆင့်မြင့်နေသလဲပေါ် မူတည်ပါသည်။
- ကျောက်ကပ်ကို အလုံးစုံ ဖယ်ထုတ်ခြင်း - ကျောက်ကပ်၊ အက်ဒရီနယ်ဂလင်းနှင့် ဘေးပတ်လည်ရှိ အသားစများကို ဖယ်ရှားပါသည်။ ၎င်းသည် အနီးနားရှိ ပြန်ရည်ကျိတ်များကိုလည်း ဖယ်ရှားပါသည်။ ၎င်းသည် ကျောက်ကပ်ကင်ဆာတွင် အများဆုံးသုံးသော ခွဲစိတ်နည်းဖြစ်ပြီး laparoscope ဖြင့် ခွဲစိတ်ရာ အသေးလေးမှတဆင့် ပြုလုပ်နိုင်ပါသည်။
- ရိုးရှင်းသော ကျောက်ကပ်ဖယ်ထုတ်ခြင်း - ကျောက်ကပ်တစ်ခုတည်းသာ ဖယ်ရှားပါသည်။
- တစ်စိတ်တစ်ပိုင်း ကျောက်ကပ်ဖယ်ထုတ်ခြင်း - ကျောက်ကပ်အတွင်းရှိ ကင်ဆာနှင့် အချို့သော အသားစများကို ဖယ်ရှားပါသည်။ ဤလုပ်ငန်းစဥ်ကို သေးငယ်သောအကျိတ်များ ( လေးစင်တာမီတာအောက် ) ( သို့) အလုံးစုံကျောက်ကပ်ဖယ်ထုတ်ခြင်းဖြင့် အခြားသော ကျောက်ကပ်ကို ထိခိုက်စေနိုင်ချေရှိသော လူနာများတွင် အသုံးပြုပါသည်။
ခွဲစိတ်ကုသနည်းဖြင့် ကျောက်ကပ်ကင်ဆာကို မဖယ်ထုတ်နိုင်လျှင် ဆရာဝန်သည် အကျိတ်ကို နေရာတွင် ထိန်းချုပ်နိုင်ရန် အခြားသောနည်းလမ်းကို အကြံပြုပေလိမ့်မည်။
- ရေဒီယိုကြိမ်နှုန်းဖြင့် လောင်ကျွမ်းစေခြင်း - စွမ်းအင်မြင့် ရေဒီယိုလှိုင်းများဖြင့် အကျိတ်ကို သေစေပါသည်။
- သွေးလွှတ်ကြောမှတဆင့် ပိတ်ဆို့ခြင်း - အရာဝတ္ထုတစ်ခုကို ကျောက်ကပ်ဆီသို့ အဓိက ထောက်ပံ့ထားသော သွေးလွှတ်ကြောထဲသို့ ထည့်လိုက်ပြီး အကျိတ်ကို သွေးစီးမှုကို ပိတ်ဆို့လိုက်ပါသည်။ ၎င်းလုပ်ငန်းစဥ်ကို ခွဲစိတ်မှုမလုပ်ခင် အကျိတ်မှ သွေးယိုစီးမှု နည်းစေရန် လုပ်ဆောင်ပါသည်။
ကင်ဆာဆေးသွင်းခြင်း
ကင်ဆာဆေးသွင်းခြင်းသည် ကင်ဆာဆဲလ်များကို ကျုံ့/သေစေနိုင်သော ကင်ဆာဆန့်ကျင်ဆေးဝါးများကို အသုံးပြုပါသည်။ ၎င်းဆေးဝါးများသည် သွေးကြောထဲသို့ ဝင်ရောက်ပြီး ခန္ဓာကိုယ်တစ်ကိုယ်လုံးရှိ ကင်ဆာဆဲလ်များကို သက်ရောက်နိုင်ပါသည်။
ပတ်မှတ်ထား ကင်ဆာကုထုံး
အချို့သော ပျံ့နေသော ကျောက်ကပ်ကင်ဆာနှင့် လူနာများသည် ပတ်မှတ်ထားကုထုံးကို ရယူကြပါသည်။ပတ်မှတ်ထားကုထုံးများသည် ဆေးဝါးများ ( သို့ ) ကင်ဆာကြီးထွားခြင်းနှင့် ပျံ့နှံ့ခြင်းတွင် ပါဝင်သော သတ်မှတ်မော်လီကျူးများကို ဟန့်တားခြင်းဖြင့် ကင်ဆာကြီးထွားပျံ့နှံ့ခြင်းကို ပိတ်ဆို့သော ပစ္စည်းများ ဖြစ်ပါသည်။ သူတို့သည် ကျောက်ကပ်ကင်ဆာကို ထိန်းချုပ်ရာတွင် အကျိုးသက်ရောက်မှု ရှိပါသည်။
ဓာတ်ရောင်ခြည်ပြကုသခြင်း
ဓာတ်ရောင်ခြည်ပြကုသခြင်းသည် ( ဓာတ်ရောင်ခြည်ကုထုံး ) သည် စွမ်းအင်မြင့် ရောင်ခြည်များဖြင့် ကင်ဆာဆဲလ်များကို သတ်ရာတွင် အသုံးပြုပါသည်။ ၎င်းသည် ကုသထားသောနေရာတွင်ရှိသော ကင်ဆာဆဲလ်များကိုသာ အကျိုးသက်ရောက်မှုရှိပါသည်။
ကျောက်ကပ်ကင်ဆာအတွက် မိမိခုခံအားစနစ်သုံးကုထုံး ( Immunotherapy )
ဤကုထုံးသည် သင်၏သဘာဝ ခုခံအားများကို မြှင့်တင်ခြင်း၊ တိုက်ရိုက်ထိတွေ့ခြင်း ( သို့ ) ပြန်လည်ကောင်းမွန်စေခြင်းတို့ဖြင့် ကင်ဆာကို တိုက်ထုတ်ရာတွင် သင့်ခုခံအားစနစ်ကို အသုံးပြုပါသည်။ ဥပမာ _ ပျံ့နှံ့နေသော ကျောက်ကပ်ကင်ဆာများအတွက် ယခင်ကအသုံးပြုခဲ့သော ဇီဝကုထုံးများတွင် interferon alpha ( သို့ ) interleukin-2 တို့ ပါဝင်ပါသည်။ ယခုလက်ရှိ အသိအမှတ်ပြုထားသော ခုခံအားစနစ်သုံးကုထုံးအသစ်များသည် အဆင့်မြင့်ကျောက်ကပ်ကင်ဆာတွင် ကောင်းသော လုပ်ဆောင်မှုနှင့် ထိန်းချုပ်မှုများ ရရှိနိုင်ကြောင်း သက်သေပြထားပါသည်။
ဆရာဝန်များသည် ကျောက်ကပ်ကင်ဆာ အကြောင်းရင်းများကို မသိသောကြောင့် ရောဂါကို ကာကွယ်ရန်သည်လည်း ရှင်းရှင်းလင်းလင်း မသိသေးပါ။ သို့သော် အချို့သော အချက်အလက်များသည် ကျောက်ကပ်ကင်ဆာနှင့် ဆက်နွယ်နေသောကြောင့် ဖြစ်နိုင်ချေများသော လျှော့ချနိုင်သော အချို့သော အဆင့်များကို လုပ်နိုင်ပေသည်။ ၎င်းတို့မှာ ဆေးလိပ်ဖြတ်ခြင်း၊ ကျန်းမာသော ကိုယ်အလေးချိန်ကို ထိန်းသိမ်းခြင်း၊ သွေးပေါင်ချိန်ကို စီမံခြင်း၊ နှင့် ထိခိုက်စေနိုင်သော ဓာတုပစ္စည်းများကို ထိတွေ့ခြင်းတို့ကို ရှောင်ကြဥ်ခြင်းတို့ ဖြစ်ပါသည်။
CanHOPE က စင်ကာပူနိုင်ငံ Parkway Cancer Centre မှ စီစဉ်ဆောင်ရွက်ပေးတဲ့ အကျိုးအမြတ်မယူဘဲ ကင်ဆာဆွေးနွေးတိုင်ပင်ပေးခြင်းနဲ့ အကူအညီများကို ဆောင်ရွက်ပေးနေပါတယ်။ CanHOPE မှာ ကင်ဆာကုသမှုများနဲ့ ကင်ဆာရောဂါများစွာအကြောင်းနဲ့ ပတ်သက်သော ပြည့်စုံတဲ့သတင်းအချက်အလက်များရှိတဲ့ အတွေ့အကြုံ ဗဟုသုတပြည့်တဲ့ စောင့်ရှောက်မှုပေးနိုင်တဲ့ အဖွဲ့တွေ ရှိပါတယ်။
CanHOPE အနေနဲ့
- ကင်ဆာရောဂါကာကွယ်ခြင်း၊ လက္ခဏာများ၊ ဖြစ်နိုင်ခြေများ၊ ကြိုတင်စစ်ဆေးနိုင်တဲ့စစ်ဆေးမှုများ၊ ရောဂါရှာဖွေခြင်း၊ လက်ရှိကုသမှုများနဲ့ လေ့လာမှုများ ပါဝင်တဲ့ ခေတ်ပေါ် ကင်ဆာသတင်းအချက်အလက်များ ပေးနိုင်ပါတယ်။
- ကင်ဆာရောဂါဆိုင်ရာ ဝန်ဆောင်မှုများအဖြစ် ရောဂါကြိုတင်စစ်ဆေးခြင်း၊ ရောဂါရှာဖွေခြင်း၊ ကုသမှုစင်တာများနဲ့ သက်ဆိုင်တဲ့အထူးကုဆရာဝန်များဆီကို လမ်းညွှန်ပေးပါတယ်။
- ကင်ဆာနှင့် ပက်သက်ပြီး ဆွေးနွေးတိုင်ပင်ပေးခြင်း၊ ကင်ဆာကုသမှုဘေးထွက်ဆိုးကျိုးများကို ရင်ဆိုင်ဖို့ အကြံဉာဏ်များပေးခြင်း၊ ကင်ဆာရောဂါကို ရင်ဆိုင်ဖို့၊ အစားအသောက်နဲ့ အာဟာရဆိုင်ရာများကို ဆွေးနွေးတိုင်ပင်ပေးပါတယ်။
- ကင်ဆာရောဂါခံစားနေရသူများနှင့် မိသားစုဝင်များ၊ ပြုစုစောင့်ရှောက်သူများကို စိတ်ခံစားမှုဆိုင်ရာနှင့် စိတ်ကျန်းမာရေး လူမှုရေးဆိုင်ရာ အထောက်အပံ့များပေးပါတယ်။
- ကင်ဆာရောဂါလူနာများနှင့် ပြုစုစောင့်ရှောက်သူများ ကင်ဆာရောဂါအကြောင်းကို ပိုမိုသိရှိပြီး သတိထားနိုင်ဖို့ အစုအဖွဲ့လိုက်လုပ်ဆောင်ခြင်း၊ အသိပညာများဖြန့်ဝေခြင်း၊ အထောက်အပံ့အကူအညီများ လုပ်ဆောင်ခြင်းများ ဆောင်ရွက်ပေးပါတယ်။
- ပြန်လည်ကျန်းမာသန်စွမ်းဖို့ အကူအညီများအတွက် လိုအပ်တဲ့အချက်အလက်များ ဆောင်ရွက်ပေးပါတယ်။
- ကင်ဆာရောဂါရင့်သူများ ဘဝနေပျော်ရေးအတွက် စောင့်ရှောက်မှုဆိုင်ရာဝန်ဆောင်မှုများကို ဆောင်ရွက်ပေးပါတယ်။
CanHOPE အဖွဲ့အနေနှင့် လူနာတိုင်းကို မျှော်လင့်ချက်အနည်းငယ်ပဲ ဖြစ်ဖြစ်ရရှိဖို့အတွက် မျှဝေမှုများ လုပ်ဆောင်ရင်း လူနာအတွက် အထောက်အပံ့နဲ့ ဂရုစိုက်မှုများရရှိစေဖို့ လူနာတွေနဲ့အတူ ကင်ဆာကုသမှုခရီးစဉ်တလျှောက်မှာ အတူရှိနေပါတယ်။